LASHAI YN IAKHUN MAWLAI PYRSHAH IA KA RANGDAJIED UTD
Shillong: Ka shi wat ialehkai ka lympung Shillong Premier League 2026, ka la khreh ban jam noh sha kaba kut, ha kaba ka resol na ka jingiakhun ba hynne ka lah sngi U Blei ka long ba ka Nangkiew Irat FC ka la lah ba kan iakhaid bad ka MLP FT da mar 2 kol, ha ka jingiakhun ba la long ha SSA Stadium, hynrei kumba ka long ba ki khmat kin phai pat sha ka jingiakhun kaban long lashai ka sngi, ha kaba ka Mawlai SC kan mih madan ban iakhun pyrshah ia ka Rangdajied United FC.
Haba phai sha ka jingiakhun ba hynne ka sngi, ia ki artylli ki kol na bynta ka MLP FT la thep ia ki da u Everestarly Rynjah (12′) bad Rapborlang Marwein (21′), katba na ka liang ka Nangkiew Irat la thep ia kine ki kol da u Yhoto Lohe (13′) bad u Neblejohn Lyngdoh (85′).
Kane kan dei artad ka jingialehkai ba khatduh ia ka Nangkiew Irat ha kane ka samoi ialehkai ba mynta, kaba lehse ka la biang ia ka ban lait na uta u line saw ban hiar na kane ka lympung iakhun, hynrei kan dang hap ba kan ap bad khmih ia ki resol kiban mih na ki jingiakhun jong kiwei pat.
Pynban ka nam iakhaid kaba mynta ka sngi, ka Nangkiew kan don ha ka kyrdan kaba phra hadien ba ka la ioh ban khur 9 point mar ia ryngkat bad ka Sawmer, hynrei kan duh ia ka kabu ksiar ban ioh aireng sha ka lympung ka SSA Super Cup, kaba plie lad tang ia ki 6 tylli ki kynhun ba ioh khur bun point ne Top 6.
Katba ka MLP FT ka pynlong ia ka ba kan kiew sha ka kyrdan kaba san hadien ba ka la ioh ba kan khur 11 point bad sah ruh sa kawei ka jingiakhun ba kan pyndep.
Kumba la kdew haneng, ki khmat mynta yn hap ban ia phai sha ka jingiakhun kaban long lashai ka sngi, ha kaba ka Mawlai SC kaba don ruh halor duh ka miej iakhein point kan aireng pyrshah ia ka kynhun ba don ha ka kyrdan ba 6 ka Rangdajied United FC, kaban long ha ka por 3 baje nohphai sngi, kaba na kane ka jingiakhun kaba 90 minit pura ka lah ba kan mih ruh ka khubor ka kynhun ban rah ia ka nam lahduh.
Lada jia ba ka Mawlai SC kan jop ia kane ka jingiakhun, kan pynlong ia ka ba kan rah ia ka nam kum ka lahduh, kaban long ka sien kaba lai hadien ba ka la lah ba kan rah teng ha ka samoi ialehkai 2022 bad 2023.
Kumban shu phai dien, kane ka khubor ka lam ia syriem kum ha ka samoi ialehkai ba la dep u snem 2025, kaba kum ka kynhun, ka Mawlai ka la iakhun pyrshah ia ka Rangdajied, kaba hangne ka donkam ban khur ia ka jingjop ban ioh phong ia ka pansngiat nam lahduh, pynban kawei kaba jia pat ka long ba ka Rangdajied, kaba la lah ba kan pynkut ia la ka samoi ialehkai hapdeng ka miej iakhein point, ka la ieng iakhun tyngeh ban iakhaid da mar shi kol, kaba pynlong ia ka Mawlai ban bat ia ka kyrdan kaba lai bad ka nam lahduh la rah da ka Langsning FC.
Ha ka samoi ialehkai 2024, lehse ym don shuh ba lah ban klet hadien ba ka Mawlai ka la lah ban tam shakhmat ha ka jingthep kol ha ka jingiakhun pyrshah ia ka Lajong, kaba na kane ka jingiakhun wat tang ka nam iakhaid kan jin da la biang bha ia ka ban rah ia ka nam lahduh, hynrei ha kaba kut, ka Mawlai ka mad syndon ia ka nam rem, kaba dei tang kane kawei ka jingialehkai ba kan shah rem, kaba la plie lad ia ka Shillong Lajong ban rah ia ka nam kum ka lahduh.
Ha kane ka samoi ba mynta, ka Mawlai ka don ia u bah Hering Shangpliang kum u coach, ryngkat ki kato katne ki rang ialehkai kiba la lah ban iai neh mynta kumba ar samoi ialehkai kum ki jong u Fairming Suting, Damanbhalang Chyne, Arkibor Makhroh, Samlang Rympei, Kevin Rymbai, Robertson Khongriah, kaba lehse kin nym lah ban klet ia ka khana ialehkai ka jong ki, kaba kiei kiei pat baroh kan shong lashai ka sngi ba da kumno kane ka kynhun kan iakhun ha madan.
