SHILLONG : Ka Confederation of Meghalaya Social Organisations (CoMSO) ka la kynnoh ba u Myntri Rangbah ka Jylla, u Conrad K. Sangma, u ïada ïa u Advocate General (AG) ka Jylla, u Amit Kumar, bad u kwah ban kiar na kaba pynshai paidbah halor ka pisa paidbah kaba la pynlut na ka bynta ka ophis jong u AG.
Ha ka kyrwoh kaba la pynmih ha ka sngi Thohdieng, u General Secretary ka CoMSO, u Balkarin Ch Marak, u la ong ba ka Sorkar kam shym la leh eiei watla ki kynhun kiba ïadei bad ka aiñ ki la pynpaw ïa ki jingkylli kiba khia halor ka rukom treikam jong u Kumar.
“Ka rukom leh jong u Myntri Rangbah ka pynsngewsih shisha. U ai jingkular ïa ki kynhun kiba ïadei bad ka aiñ, hynrei hadien kata u ailad ïa kita ki jingkular ban kylla long kiba khlem jingmut. Lada ki kyntien jong u kim don jingkordor, kaei pat ka jingngeit kaba ki paidbah kin don ïa ka Sorkar jong u?” la ong u Marak.
Ka seng ka la kynnoh ba ka Sorkar ka buhrieh ïa ki jingtip halor ka jingpynlut pisa.
“Haba ki paidbah ki pan jingtip lyngba ka RTI halor ki jingsiew bad ka jingpynlut pisa ha ki kam aiñ, hynrei ka Sorkar kam kwah ban pynshai, kane ka wanrah ïa ka jingkylli kaba khia — ka Sorkar ka pyrshang ban buhrieh aiu? Balei ki paidbah kim ïoh jingtip shaphang kumno la pynlut ïa ki klur tyngka jong ka pisa paidbah na ka bynta ki kam ïasaid aiñ?” u la kylli.
Ka CoMSO ka la kylli ruh balei ka Sorkar ka dang bteng ban thung ïa u briew uba nabar ka Jylla, haba ki don ki nongïasaid aiñ kiba tbit bad kiba la biang ka jingnang jingstad hapoh Meghalaya kiba lah ban bat ïa ka kam Advocate General.
“Ka Meghalaya ka don ïa ki nongïasaid aiñ kiba la rangbah, kiba tbit bad kiba la biang bha ka jingnang jingstad, kiba lah ban bat ïa ka kam Advocate General. Balei u Myntri Rangbah u paw ba u kham khia ka jingmut ban ïada ïa uwei u briew ban ïa kaba ïada ïa ka jingshaniah jong ki paidbah ha ka Sorkar bad ka burom jong ka tnad aiñ jong ka Jylla?” la kylli u Marak.
U la ong ba kane ka jingïakajia ka la ktah ïa ka rukom treikam jong ki ïingbishar bad ïa ka jingpynïoh ïa ka hok sha ki paidbah.
“Kane ka jingïakajia ka la ktah ïa ka rukom treikam jong ki ïingbishar, bad ki paidbah kiba ju leit wad ïa ka hok ki la shah ktah na ka daw ka jingeh pyrkhing jong ka Sorkar. Ka jingkitkhlieh ka shong beit ha ka Sorkar Conrad Sangma, kaba la ïoh ïa ki lad kiba biang ban pynbeit ïa kane ka kam, hynrei ka la jied ban sngap jar,” la ong u Marak.
U la bynrap, “Ka Meghalaya kam dei ka jaka shimet jong ka Sorkar. Ym lah ban pynïaid ïa ki jaka treikam paidbah katkum ka mon shimet jong ki briew. Ka jingsngap jar kaba dang bteng jong ka Sorkar mynta la sngewthuh ba ka dei ka rai kaba la shim khnang ban ïada ïa u Amit Kumar, ha ka jaka ban pynneh ïa ka jingkitkhlieh bad ka jinglong kaba shai ha ka rukom treikam.”
