SHILLONG : Ka National People’s PartyMeghalaya ka la rai ban sdang thymmai ïa ka jingjied kyrtong na bynta ka elekshon MDC ha Garo Hills Autonomous District Council , hadien ka jingpynbeit thymmai ïa u pud u sam jong ki constituency ka Council.
Ka party ka la pyndam shuwa ïa ka thup kaba 29 ngut ki kyrtong kaba la pynbna ha ki ar bynta ha u Rymphang bad Lber mynta u snem. Kane ka rai ka wan hadien ba ka elekshon ha GHADC ka la shah pynjlan biang da hynriew bnai.
U President ka NPP Meghalaya, Bah Prestone Tynsong, ula pynmih hukum ban pynsangeh treikam ïa ki ar tylli ki jingpynbna kyrteng kiba la mih ha ka 16 tarik Rymphang bad 4 tarik Lber, katkum ka jingtyrwa na u Working President ka party uba dei khmih ïa ka ri-lum Garo, u Marcuise N Marak.
U Bah Tynsong ha ka hukum ula ong ba kane ka jingpynsangeh ka long kaba donkam namar ka jingpynbeit thymmai ïa ki 29 tylli ki constituency ka GHADC.
Katkum ka shithi u Marak kaba 6 tarik Risaw, kane ka mat ka la shah bishar bniah ha ka jingïalang jong ki nongïalam ba rangbah ka party kaba la long ha ka iing sah jong u Myntri Rangbah, Conrad K Sangma, ha u Nailar.
Ha katei ka jingïalang, kaba la pynïaid da u Myntri Rangbah dalade, la donlang ruh u Lamphang ka Ïingdorbar Thawaiñ, Thomas A Sangma, bad kiwei ki nongïalam ba rangbah ka NPP.
U Marak ha ka shithi ula ong ba namar ka jingpynbeit thymmai ïa u pud u sam jong ki constituency, ka party ka la rai ban pyndam ïa ki kyrteng jong ki kyrtong kiba la jied bad pynbna mynshwa, bad ban bishar biang ïa ki kyrteng katkum ka jinglong thymmai jong ki constituency.
Ka thup kaba la pynbna mynshwa ka kynthup ïa baroh 29 tylli ki constituency ka GHADC, ha kaba 24 ngut ki kyrtong ki la shah pynbna ha ka thup kaba nyngkong bad san ngut ha ka thup kaba ar.
Da ka jingpynbeit thymmai ïa ki constituency, ki nongïalam ka party ki la rai ban sdang biang ïa ka process ban jied kyrtong, khnang ba ki kyrteng ba thymmai kin ïahap bad ki constituency ba thymmai.
